PICATAU MANCA S'ESTOFAR
Des per Nadau, lu pitit Picatau s'eimajava dau Mardi-Gras e, tots los jorns, eu damandava : « A mair, es quò tòst Carnavar ? »
A la fin, tot parier, quela granda festa ‘ribet.
Nòstre gormand ne migret poench de far « aus marquaras » aveque los autres dròlles . au luoc de se deguisar, eu aimava mielhs topinar. Coma sa mair ‘via beucòp de trabalh, eu li eidet far la cosina (un còp n'es pas cotuma). Eu pòrtet lu boesc, abrandet lu fuòc, eipotit las prunas par far ‘na tartra, e, de temps en temps, per se metre en apetit, eu desbrechava las marmitas e sinava lu fricot.
Quel'anada, los Picataus ne ‘chapteren pas de bulit. Com'ilhs ‘vian toat lu pòrc, ne manquavan pas de vitoira. ‘Vian de bona sopa negra, un gros farci, un troç de rostit e un chapelet de bodins, sens comptar la tartra, los binhets e lu cafet.
Quand foguet disnar, lu prumier sietat qua fuguet lu pitit Jan. Eu se trapet de minjar com'un chat magre. En començant, tot anet bien. Lu farci e lu rostit fondian dins sa gorja coma lu boesc dedins lu forn e sos botons de malinas petavan un aprep l'autre. Aveque los bodins, eu n'aguet pas tant de chança. Los treis prumiers fileren coma de l'anguilas, mas lu quatriesme, qu'eu avalava tot entier, se viret de travers dins lu fond dau gòrjareü. Emb son det, eu lu posse. A ba ! eu aguet beu gozornar, empossible de lu far coular.
De quel afar, lu paubre Jean ne podia pus lenar. Mesma eu començava venir blu.
N'un dit que i a un Bon Deu per los sadolards. Fau creire que n'i a n'autre par los gormands. Jurtament, dins queu mament, mossur Brindoiron, lu medecin de St-Crampacin, se trobet de passar dins la rota.
« Mossur lu Medecin ! credet la Picatauda, venez vite, seu platz ! Notre dròlle s'estrangla ! »
Brindoiron entret còp sec. Eu eissaiet de rachar la tripo. Jamais eu ne poguet russir.
« Chanjam de plan, s'isset-eu. Peique lu bodin ne vau pas surtir, vau lu conhar dedins. Femno, passas-me lu boiron de las pous. »
Sitòst qu'eu l'aguet, eu se ‘trapet de pigonhar dins lu gòrjareu de Jan. Mas qu'era talament plen per darreir lu bodin, qu'eu ne poguet pas l'enfonçar.
Bonur per lu goiat que la Madelin venguet. Pus fina que lu medecin, la chauchet d'un còp sec sur l'embonit dau malaude. Qua faguet ressort, mon amic, e qua se desbaconet. Com'un bolet de canon, lu bodin volet sur lu nas de Brindoiron. Bien entendu, eu n'aguet pas de mau (un bodin qu'es si moflet!). Si qua ‘via estat lu boiron, qua li rachava los uelhs.
« Merci, ma paubra Madelin », disset Picatau quand eu poguet parlar. Aprep, eu paret au medecin un còp d'uelh mau jauvent.
« Tant qu'a vos, s'isset-eu, vos fau pas de compliments.
- Ni me, se dit la Madelin. Senta Vierja ! Vos n'en atz dau topet de sonhar los malaudes emb d'un boiron... »
Mossur Brindoiron se trobet si coion, que, sur lu còp, eu ne badet pas lu bec. Quand eu reprenguet sos sangs, eu disset au pair dau dròlle : « Vous me devez dix francs. » (Dins queu temps las consurtas n'eran pas si charas qu'au jorn d'auei.)
« Dietz francs ! dit lu Becat, tot esbufat. Dietz francs ! per lu trabalh que v'avetz fach ? Per mon arma, quò qua n'es bien jurat, vos n'auretz pas un escrupit !
- Me, s'isset la Marieta en rachanant, sirai pus generosa : li balhe lu boiron. L'a-t-eu pas bien meritat ? M'es d'avis qu'eu sap bien s'en servit... »
Mossur Brindoiron viset de bingois l'òme esmalit mai la femno mocandiera.
« N'i a ren a far aveque quilhs aseraus », penset-eu, e, coma lu chin daus Picataus ranava darreir sos talons, eu ne gromet pas dins la maison. Eu passet defore sens ren dire.
« E ! mossur Brindoiron ! credet la Marieta en risent, v'òbludatz vòstre boiron. Eu vos fara fauta per sonhar d'autres malaudes. »
Mas lu medecin ne viret quitament pas la testa. Eu se desfilet coma la lebre quand los chins la seguen. Tant qu'au dròlle, eu ne perdet pas coratge. Eu se viret dau biais de sa mair e de la vielha Madelin que començavan de platussar.
« Femnas, se dit, qu'es pas lu tot de farlassar. E la tartra, ent'es-t-ela ? »
Enric Contòviòrla ,
Jan Picatau de Sent-Barrancon