LU BAPTISME DE PICATAU

Per Nadau baptizeren Picatau.

La Madelin fuguet patrona coma ‘la ‘via fach la femna-saja quand lu dròlle nasquet. Mas ‘la n'aguet pas besuenh de lu portar. Eu era si rude qu'eu marchava tot sol. Per davalar dins lu borg eu espingava com'un lebraud. De'n pauc de mai qu'es se qu'auria portat la patrona.

Quand ilhs ‘riberen davant l'egleisa, lu mainatge se rebifet.

« Per mon arma, s'isset-eu, vòle pas me conhar dins quela granja ! Quò i fai si brun que chas lu lop ! »

Ne cujeren pas l'i far entrar.

Quand lu goiat fuguet davant lu beneitier, eu s'esplamit.

« E ! la brava pila ! s'isset-eu De siria-t-ela comòda per far beure nòstre asne !

- Quò n'es pas de pila, pitit fat, disset la patrona. Qu'es ‘na font beneitiera, per baptizar los pitits.

- A ! qu'es ‘na font ? E ben, que ne sie quò. Tot aure n'ai pas set. »

Lu curet de Sent-Barrancon n'era pas eissanhe. Quand eu baptizet lu pitit Jan, eu li rencuret pas l'aiga benesta. Eu ne'n faguet pissar jurca dins son cagoelh. Lu dròlle ne'n fotet n'escoilada coma s'ilhs volian l'esvirolar e eu se faguet laschar. Aprep, eu fugit en esversant quauquas chieras.

Lu troberen atapat dins lu confessionau. Eu n'auria poench surtit s'ilhs li ‘vian pas promes de la tartra mai daus binhets.

Quand eu fuguet apasimat, lu pairin menet la minin sos la còrda de la clòcha e li faguet amic perque lur filhòu ne sie pas gormos. Coma qu'era ‘na crasna filha, eu se contentet pas de l'embraçar un còp sur chasca jauta. Eu requilhet; crese mesma qu'eu la chatinglet.

Lu curet trobava qu'eu fasia tròp durar lu plaser. Eu volia li damandar s'eu ne ‘via pas tòst ‘chabat, mas dins queu mament, Picatau lu tirgosset per sa rauba.

« Mossur lu Curet, qu'eu li disset, i me damande perque vos m'atz tant alacat ? Qu'es bon per m'enrumar. N'autre viatge, quante vos tornaretz me baptizar, v'en preje, fasetz chaufar l'aiga beneita. »