Ujan, la cinquesma dictada en Charanta (dotzesma nacionala) s'a passat lu dissades 31 de genier de 2009 a 2 oras demia de l'apres-miegjorn a la sala de las festas de Charreç en mesma temps que dins 40 autras vilas d'Occitania e a Barcelona.

Per s'inscriure per dueinan terradoc@terradoc.net

DICTADA OCCITANA NACIONALA

(texte dictat ujan a Charreç)

La Lison dau Peirat

’L’es viste presta, la Lison, lu matin. Te respone que ’l’a viste fait perque ’la se coija meitat ’bilhada emb sa chamisa, sos cotilhons, sas malinas. Lu rerta es tot conhat dessos l’eidredon ente ’la met levar la pasta quand ’la fai un pastis. Quò fai que, entau, ’la n’a mas mestier de ’trapar son corset, lu crochetar per puescher se linchauçar, tirar sa chamisa de nuech e engulhar sa blauda, un gilet per-dessos, un gilet per-dessur.

‘La conha sas doas pantoflas dins sas doas sòcas, vei-’la-’qui partida per ’lumar son fuòc… e quò n’es pas un pit’ afar !. Tota sa vita, ’l’a ’lumat lu fuòc dins la chaminada, mas ‘l’a ‘chaptat ’na cosiniera e ’la s’aprendra jamai la far marchar ! Dins la chaminada, qu’eria aisat : demorava totjorn quauquas brasas de la velha ; n’avia mas mestier de dos-tres pitits brochons, de dos-tres còps de bufet, e, flet, lo fuòc tornava ’trapar. Mas per ’lumar ’quela cosiniera qu’es l’infern daus vonhons roges ! Um li a dich de ’pelar sus la manivela, a drecha, e d’esperar un pitit mament avant de tornar metre sus feu continu. Òc plan ! ’L’a beu l’i se prener de tots los biais, tirgossar e gigonhar ’quela filh de garça de manivela, quò l’i fai pas mai que de ’pelar un chin Guilhem !

Totparier, a la fin de las fins, quò ’chaba per se ’lumar tot sol, dau temps que la Lison suert pissar defòra, davant sa pòrta, sus son esbalet. ’La escarta las chambas, ’pela d’una man la belosa, los cotilhons e las malinas e ’la pissa d’en-piès en s’esmajant dau temps.

Que voletz-vos far….Qu’es entau, qu’es pas autrament, mas qu’es per dire.

Monica Sarrasin
La Lison dau Peirat – Edicions dau chamin de Sent Jaume - 2005

Monica Sarrasin, l'autor de la dictada 2009