Document sans nom

Bravas gents, ercusatz si me trompe, vos vatz suar sur quela istòria que se passet veiqui tres ans dins queu borg que coneissetz segur pas per la bona rason qu'exista pas enquera. Despuei questes darriers jorns, jurtament, un vent noveu bufa a Chantagreu. Quò es pas lo ploiau, ni l'autan, nimai lo mata-chabra o lo vent negre. Quò es un vent que fai se levar los sovenirs, los bons mai los meschants, que fai tombar las reputacions, que daus uns còps esvelha los mòrts ; quò es un vent qu'entraina au long de las charrieras mai de lingas de pelha que non pas de fuelhas mòrtas ; un vent que mena de vilatge en vilatge, de maison en maison, daus pilòts de bafeiatge, de plenas gòrjas de platussarià ; un vent que daus uns còps sent un pauc au rigoladis, a la neciariá, a la meschancetat. Queu vent, que bufa nonmàs un còp tots los sieis ans e que, quante se 'resta de bufar, laissa tombar de las vestas chas los uns, e fai se pincar quauques pinhiers chas los autres, l'avetz plan reconegut : quò es lo vent de las eleccions.