Daus siecles de temps, los Lemosins dau Peirigòrd e los Peirigòrds dau Lemosin an fach (fait) lurs devocions a Senta Trulla (trula), la patrona de las Banturlas…

Per ben (bien) dire, Senta Trulla (trula) n’um sabia jamai tròp ente qu’es que ‘la demorava, ente l’avian pausada a la darriera procession. N’um l’obludava regulierament (regularament), e per ma fe se fasia obludar per plaser…

E pertant, de l’armadas de pelegrins assedrats, en renjadas sarradas, mai esbufats, la cherchavan ! La cherchavan, coma se deu, totas l’annadas de tretze lunas, que son de l’annadas beneisidas per nòstra Senta Trulla.Au dire daus ancians (anciens), mai de las vielhas daus picadis, daus signes (sinhes) anonciavan (anonçavan) sa presença au país… Vau ne’n contar quauqu’uns (quauques uns) quò pòt totjorn servir (siervir)…

A l’escòla, los dròlles badavan en visant los nuatges (nivols - nivors) per las fenestras, los cumulòs, los estratòs, los nimbus…. mai las quitas auchas sauvatjas quand passavan en novembre (nòvembre). A la fin, tornavan ben a la classa, grands uelhs e gòrja dubrida (drubida, dreibida…) : « A ? mas setz ‘quí, Mossur (monsur) lu Regent ? »

Au país (païs) trullaud (trulaud), se fasia lu trabalh, segur… mas tot bravament… vaque… vaque… vaque…Qu’ es qu’ilhs prenian totjorn granda distança, pro de reculada (recuolada), emb l’eficacitat, lu rendament, la competicion… ! A ! se’n mesfiavan de ‘quel esperit de competicion, te responde que (qu’ilhs) l’i tombavan pas dins lu tracanard tendut per ‘Trapa-sòus-l’Expansion, la Conquesta-daus-merchats, ‘Trapa-sòus-La Bancarota !

Non, (ilhs) l’i tombavan pas dins son tracanard a non ! Queu brave monde banturlaud se convidavan per de las velhadas plasentas sitòst sieis oras. L’i ‘navan tranquilles, s’i tenian aimables, ne’n tornavan apasimats per de las grandas nuechs de raibes prunds…