Lu conte dau jau.
Dins l'ancian temps, n'aviam un vielh jau ; eu menava permenar sas polas per los champs e quilhs bòscs.
Un bon jorn, ilhs gratavan sos las fuelhas. To en gratant, lu jau trobet una gròssa borsa de teal. L'era plena d'au e d'argent.
Eu prend quela borda emb son bec. Eu la pòrta a la maison en chantant content coma quatre.
Dins lu vilatge, n'i avai un qu'ilhs apelavan Mossur d'Arglan. Eu disset :
- Fai veire, jau, quela borsa ?
Quand eu la tenguet, eu ne voguet pus la li tornat. Eu l'emportet.
Lu jau comencet a chantar :
- Mossur d'Arglan, tòrna mon aur e mon argent.
Mossur d'Arglan ne lu tornava pas, lu gardava totjorn. Lu jau continuava a chantar, quò esmalicet Mossur d'Arglan ; eu disset :
- Lu vau trapar, lu metrai coijar coma mas mulas, las l'auran ben.
Lu jau se'n anet bien esnoiat. Eu se'n anant, eu trobet lu lop.
- Adiu, compaire lu lop, li disset-eu.
- Adiu, compaire lu jau, disset lu lop. Ente vas-tu ?
- Ieu sabe ben. Si tu vo'es venir coma me, disset lu jau, te farai far un bon repas.
Se disset lu lop :
- Ne'n sirai bien content.
- Si tu voles venir, disset lu jau, forra-te dins mon cul de tela.
Lu veiquí partit pus loenh. En rota, eu trobet lu rainard.
- Adiu, compaire lu rainard, disset-eu.
- Adiu, compaire lu jau, disset lu rainard. Ente vas-tu ?
- Ieu sabe ben, disset lu jau. Si tu voles venir coma me, te farai far un bon repas.
Veiquí lu rainard esberbit coma de jamai.
- Ne'n sirai bien content, jau, disset-eu.
- Si qu'es entau, forra-te dins mon cul de tela, disset lu jau.
Eu se'n vai pus loenh ; eu tròba las becas e los burgauds.
Eu lur disset :
Si vautres voletz venir coma me, vos responé que vos farai fissar vòstra aise.
Las becas e los burgauds accepteten. Lu jau las faguet conhar dins son cul de tela.
Pus loenh, eu tròba una font.
- Ente vas-tu, jau ? disset la font.
- Ieu sabe ben, disset lu jau. Mossur D'arglan a pres mon aur e mon argent. Si tu vo'es venir coma me, tu me farai bien plaser, tu m'aidaras.
La font vòu bien. Lu jau la forra dins son cul de tela.
Eu s'en tòrna chas se ; eu rib'a la pòrta de Mossur d'Arglan. Eu credet :
- Mossur d'Arglan, tòrna me moun aur e mon argent !
N'aïas pas paur paur, te menarai ben, disset Mossur d'Arglan.
Quand venguet l'enser, eu faguet trapar lu paubre jau per sos metadiers e lu tiret dins l'estable de las mulas.
- Las l'auran ben tuat lu mandin, se disset-eu.
Veiquí lu jau barrat aveque la mulas ; las rossinavan, tapavan dau pie ; lu jau fasia com'elas, ne s'i fiava pas ; l'aurian chabat per lu junher.
Lu jau disset au lop :
- Sòrt de mon cuu de tela ! Tua-les totas ; minja ne'n ton aise.
Lu lop surtit, comencet de volar sus l'eschinas, d'esrenar, de beure dau sang, de minjar. En ren de temps, totas las mulas erian tuadas.
Lu mandin, des que quò faguet jorn, Mossur d'Arglan n'aguet ren de pus preissat que de fugir dins l'estable de sas mulas per veire si lu jau eria tuat. Dès qu'eu ubrit, lu jau volet defòra, fier coma de jamai, que se meguet a chantar a plena gòrja.
- Mossur d'Arglan, tòrna-me mon aur et mon argent.
- Cré, se disset, Mossur d'Arglan, quelas bestias n'an pas pogut lu tuar.
Eu rentret ; eu vei qui totas sas mulas tuadas.
- Me veiqui brave, se disset-eu. Bogr de jau, fau ben que t(aïe ! Lu metrai coma mon auchas ; las lu secodran ben.
L'enser, eu lu fai sarrar dins l'estable de l'auchas. Veiqui l'auchas a eschinlar.
- Sòrt, rainard de mon cuu de tela, disset lu jau. Estrangla las totas. Minja ne'n ton aise.
Lu rainard era plan content. Tota la nuech, eu estrangla e minja.
Quanbd quò fuguet jorn, quò tardava a Mossur d'Arglan de veire si lu jau era viu. Eu dubrit. Lu jau volet defòra :
- Mossur d'Arglan, tòrna me mon aur e mon argent.
- Diable ton jau, disset Mossur d'Arglan espaurit. Vai quò aver fach en aver fach parier aveque mon auchas coma aveque mas mulas ?
Eu entret : eu vai veire totas son auchas estrangladas. L'estable eria plen de sang e de plumas.
- Queu jau, qu'es lu diable ! se disset-eu. Queraque pertant, nos ne'n vendran ben a l'abot.
- Einuech, li disset-eu, te farai coijar coma mas tres filhas. Las te sarraran tant ; las t'auran ben.
- Mossur d'Arglan, chantet lu jau, torna-me mon aur e mon argent.
Quand quò fuguet nuech, Mossur d'Arglan disset a sas filhas.
- Mas pitas, vos veiquí lu jau. Fau qu'eu coige aveque vos ; tachatz moïen de l'esbolhar.
Quand lu jau sentet que las filhas lu sarravan, eu disset :
- Becas e burgauds, picatz ente quò n'i a pas de piaus.
L'enmandin quand quò fuguet jorn, Mossur d'Arglan vai veire si lu jau eria mòrt. Eu li volet per dessus la testa.
- Mossur d'Arglan, credet-eu, torna-me mon aur e mon argent.
Lu pair vai veire sas filhas ; l'erian demias mòrtas, ufladas de pertot a plenas peus.
Se disset Mossur d'Arglan :
- Coma far ? Fau be pertant en aver rason. Nos vam chaufar lu forn. Entau, nos l'auram ben. Nos ne porian pas l'aver autrament.
Quand ilhs agueten chaufat lu forn, qu'eu eria bien roge, fasia de la flmaba, ilhs torneten trapar lu paubre jau, lu prengueten per l'alas, lu foteten dins lu forn.
De queu temps, lu jau disset a la font :
- Sòrt, la font !
Veiquí la font espanida per tot lu forn. A la minuta, lu forn fuguet tant negre que la chaminéia.
Quand Mossur D'Arglan venguet veire, eu duebra lu forn ; lu jau volet defòra.
- Mossur d'Arglan, chantet-eu, torna-me mon aur e mon argent !
De queu còp, Mossur d'Arglan trapet la borsa dau jau ; eu la li tiret sus los teules.
- Te la veiquí, disset-eu, tu m'as tròp fach de gareges.
Lu paubre jau s'en tornet aveque sas polas, content coma quatre. Quand las lu vitent ribar, las chanteten.